ياناس ياهوووووووه

انا نجحت

نقطه بيضه

انبارح كانت خطوبة سوزان,سوزان مش صديقه مقربه ليه ابدا, افتكر ان اول مره اتقابلنا فيها مكنتش سعيده .اخر واحده فى الناس اللى اعرفهم تلبس حجاب .احيانا
كنت بغير يمكن لانى اول بنت البس حجاب مش عشان مكنتش مقتنعه بيه. انا عارفه انى كان لازم البسه حتى يمكن ربنا كرمنى وفى نفس السنه رحت السعوديه وحجيت .
كل اصحابى اول ما لبست الحجاب كانوا مستغربين وشايفين انى حرمت نفسى من حاجات كتير بس بعد ما حجيت النظره اتغيرت
نرجع لسوزان كانت اول بنت باباها يموت واروح اعزيها ,بطريقه غريبه جدا حضتنى وقعدت تعيط فى حضنى حوالى 10 دقايق مكنتش اعرف انى صحبتها المقربه غير يومها
قعدت تحكيلى على حاجات مفتكرتهاش بعدها يمكن لانها طلبت منى كده او يمكن لانى بطبعى مبحبش اخزن ذكريات الناس
مقدرش اقول ان يومها فهمت يعنى ايه موت او يعنى ايه فراق.بس حسيت يومها انى ليه لزمه
مبنتقابلش انا وسوزان ولا بنتكلم فى التليفون خالص.لكن كل ما نتقابل صدفه اى حد سهل انه يقول علينا انتيم من لهفتها على وشوقها انها تحكيلى .حتى يوم خطوبتها
مكنتش اعرف حد فى الفرح وكنت داخله القاعه وانا خايفه جدا من شكلى وانا واقفه بدور على اى حد يقولى تعالى اقعدى جنبى
بس لهفة سوزان لما شفتنى وازاى حضنتنى زى ما تكون بتقولى انا نفسى المس السما وشدت خطيبها وعرفته عليه
ورجعت تانى حضتنى اوى وباستنى ومكنتش خايفه على مكياجها ولا على شعرها ليتبهدل .وقتها بس عرفت انى غاليه عليها
رغم انها متعرفش عنى اى حاجه خالص بس كفايه عليه لهفتها وشوقها كل ماتشوفنى